400 миллион сўм пули бўлган фуқаролар Тошкентда доимий рўйхатга олинади

Қўшилди: 26 июл 2017 11:40
Кўрилди: 355
Комментарии: 0
400 миллион сўм пули бўлган фуқаролар Тошкентда доимий рўйхатга олинади
Ниҳоят қонунчиликка кўпчилик кутаётган ўзгариш киритилди, деб ёзади ҳуқуқшунос блоггер Хушнудбек Худойбердиев. Яъни Тошкент шаҳри ва вилоятида доимий пропискаси мавжуд бўлмаган шахслар ҳам уй сотиб олиш ҳамда бунинг эвазига доимий прописка олиш ҳуқуқига эга бўлди.
Бунинг учун янги қурилган уйлардан баҳоси камида энг кам ойлик иш ҳақининг 2500 баравари миқдорида уй сотиб олиш керак. Бу бугунги ҳисоб бўйича 374 млн. 437 минг 500 сўм бўлади.
Бундан ташқари шартноманинг 5%и миқдорида давлатга тўланадиган бож ҳам бор. Бу камида 18 млн. 721 минг сўм бўлади.
Бундан келиб чиқадики, Тошкент пропискасига кириш учун камида 393 млн. 159 минг сўм пулингиз бўлиши керак. Шунда ҳам уй сотиб оласиз, ҳам пропискага кирасиз.
Янги қурилган уй деганда фойдаланишга топширилганига камида 3 йил тўлмаган уй тушунилади. Пропискага кириш учун Тошкент шаҳар ҳокимлигининг уй фойдаланишга топширилганига 3 йил тўлмаганлиги ҳақидаги махсус маълумотномаси ҳам керак бўлади.
Агар мабодо кимдир янги уйлардан бирини сотиб олиб, уни 3 йил ичида бошқага сотмоқчи, алиштирмоқчи ёки ҳадя қилмоқчи бўлса, унда нотариусдан расмийлаштириш учун энг кам ойлик иш ҳақининг 400 бараварини тўлаши керак. Бу бугунги кунда 59 млн. 910 минг сўм дегани. Худди янги машинани 1 йил ичида сотиш қимматлиги каби, янги уйни 3 йил ичида сотиш ҳам қимматга тушади.