ХОТИРА ВА ҚАДРЛАШ

Қўшилди: 08 май 21:00
Кўрилди: 436
Комментарии: 0
ХОТИРА ВА ҚАДРЛАШ
Ҳар йили 9 май куни юртимизда “Хотира ва қадрлаш куни” нишонланади. Ушбу кун шарофати билан кўплаб кекса отахону онахонларимиз халқимиз эъзозида бўлиб, моддий ва маънавий жиҳатдан қўллаб-қувватланади. Бу кун тарихнинг оғир синовларини бошдан кечирган, фидокорона меҳнат қилган табаррук ёшдаги отахон, онахонларимизга ҳурмат ва эҳтиром кўрсатиш айёмидир.
Ушбу кун муносабати билан халқимизнинг эзгу фазилатлари янада ёрқин намоён бўлади. Ёшликнинг навқирон чоғларини уруш оловларида, жанггоҳларда ўтказиб, бугунги тинч ва осойишта ҳаётимиз учун курашган инсонлар жасорати беқиёсдир.

ҲУРМАТ ВА ЭҲТИРОМ ИФОДАСИ
Республикамиздаги барча таълим муассасаларида “Хотира ва қадрлаш куни” алоҳида тайёргарлик руҳида ўтказилади, ўқувчи-ёшларга “Хотира ва қадрлаш куни” моҳияти ва мақсади тушунтирилади. Ўтган аждодлар ҳаёти, фаолияти ҳақида маълумотлар, эсдаликлар тўплаш ишлари амалга оширилади. Марҳумлар оиласидан, уруш қатнашчилари ҳолидан хабар олинади, уларга ёрдам берилади. Тадбир ўтказилаётган жойлар, қабристонларда ҳашарлар уюштирилиб, ободончилик ишлари олиб борилади.

БИЛАСИЗМИ?
1999 йил 9 май куни республикамиз пойтахтида Хотира майдони очилди ва шу кундан буён 9 май Хотира ва қадрлаш куни деб нишонланмоқда.
2000 йил 12 майда “Шаҳидлар хотираси” ёдгорлик мажмуи бунёд этилди.
2010 йил 12 январда Тошкент шаҳрида Қуролли Кучлар музейи олдида “Жасорат боғи” барпо этилди. Унда эгилган ҳолда Ватанга содиқлиги ҳақида қасамёд қилаётган аскар сиймоси акс эттирилган бўлиб, мазкур боғ Ўзбекистон Республикасининг Қуролли Кучлари шарафига бунёд этилган.

ТАРИХИЙ ХОТИРА
Тобора тарихга айланиб бораётган суронли кунлар хотираси ушбу кун муносабати билан яна бир бор ёдга олинади. Қутлуғ сана муносабати билан юртимиз шаҳар ва туманларида ташкил этиладиган тадбирларда ўтганларни хотирлаш, ёнимиздагиларнинг эса қадрига етиш каби эзгу фазилатлар намоён бўлади.
Айни навқирон йигитлик чоғида она Ватан ҳимоясига отланиб эл-юрти, муқаддас тупроғи учун қон кечиб мардонавор курашган уруш қатнашчилари елкама-елка туриб жанг қилган дўст-у биродарларини она сиймоси ила яна бир бор ёдга олади. Ҳар йили олис йилларда қолган биродарлар соғинчи кўзларда балқиб турган қатра ёшларда намоён бўлади. Хотиранинг муқаддаслиги, абадийлиги яна бир бор ўз исботини топади.

СЎНГГИ СЎЗ
Мустақиллик шарофати билан халқимиз тинч, осойишта ва фаровон ҳаёт кечирмоқда. Ўша оловли жангу жадалларга гувоҳ бўлган, иштирок этган фахрийлар бугунги кунда юртимизда бармоқ билан санарли даражада қолишган.
Шундай экан, келинг, уларга янада кўпроқ ғамхўрлик кўрсатиш ва эъзозлаш барчамизнинг Ватан олдидаги бурчимиз эканлигини унутмайлик!